ادي اللي اخدناه من الثورة , هو أنتم يابني هتفضلوا واقفين في الشارع علطول ؟ , يابني هو أنتم مش كرشتو الراجل الكبير ماخلاص كده ! ,يابني خربتوا البلد دي مش ثورة دي يبني - قال يعني أنا اللي قمت بالثورة لوحدي - الجمل دي بتسمعها كل يوم من ابوك , جدك, الدكتور بتاعك في الجامعة أو حتى سواق تاكسي عجوز..بإختصار ناس كلها معدية ال 50 وال 60 سنة فالبلد دي..مع إنك لو فكرت شوية الناس اللي بتتكلم دي أتخن واحد فيهم فات عليه ثورة 1952 محدش فيهم مثلا حضر ثورة 1919 ! يعني كان فيهم ناس لسة بترضع أيام ثورة يوليو واكبر واحد فيهم كانت مامته بتناديله عشان يبطل لعب في الشارع ساعة بيان السادات بتاع مجلس قيادة الثورة !..اومال مصدعنا ليه في الطالعة وفي النازلة
نفسي في مرة أقول ل واحد فيهم أنتم أصلا عمركم ماعشتو ثورة ولا حتى سمعتوا عنها ! لأن ثورة 1952 دي كانت انقلاب مسلح من الجيش على الحكم الملكي ...
من اللواء أركان الحرب محمد نجيب القائد العام للقوات المسلحة إلى الشعب المصري
اجتازت مصر فترة عصيبة في تاريخها الأخير من الرشوة والفساد وعدم استقرار الحكم. وقد كان لكل هذه العوامل تأثير كبير على الجيش وتسبب المرتشون والمغرضون في هزيمتنا في حرب فلسطين.
وأما فترة ما بعد هذه الحرب فقد تضافرت فيها عوامل الفساد وتآمر الخونة على الجيش وتولى أمره إما جاهل أو خائن أو فاسد حتى تصبح مصر بلا جيش يحميها
اللي فات كان جزء من خطاب مجلس قيادة الثورة للشعب المصري يعني الجيش كان بيطهر نفسوا وملوش دعوة بيكم ..لا بقى قالك ثورة ولا بتنجان ! ده بإعتبار إن في حد فيهم أصلا سمع الخطاب وإنه مكنش نايم ساعتها عشان ماما متعقبوش
يعني مثلا مفيش حد فيهم نزل يحتفل بعد خطاب التنحي ولا مثلا نزلوا وقالوا الجيش والشعب إيد واحدة ! طيب على أي أساس بقى بتحكموا عالثورة وأنتم زيكم زينا
بإختصار إذا كان جيل من خاف سلم عايز يخاف ..يخاف عشان جيل اللجان الشعبية والبلطجية وموقعة الجمل مش هيسلم تاني
خطاب السادات كاملا
